GURE KANOA - Zurrunka teatroa

Abba, Senegalgo arrantzale familia batean jaiotako haurra da. Berak ongi daki Maam Kumba kantuan hasten denean bere bihotzean bizi den Arrain Argitsua mila kolorez piztu eta, herritarrek arrantzatu dezaten, arrainak erakartzen dituela Arrainen Etxera, horrela deitzen bait diote haiek itsasoari. Baina zoritxarrez itsasontzi handiek haien bizimodua eraldatu dute, Maam Kumbaren bihotzeko arraina sare artean harrapatuta, Maam Kumba mutu gelditu da, isildu da jakituriaren kantua, mutu geratu da herria, arrainik gabe Arrainen Etxea. Eta ondorioz Abba ezustekoz beteriko bidaia luzean murgilduko da.

Ipar Portura heldu eta Izaro ezagutuko du, arrantza-ontzi erraldoi baten patroiaren alaba. Bi gaztetxoek haien errealitate desberdinak elkar trukatuko dituzte, bi mundu, bi begirada. Eta elkarrekin, ezinezkoa zirudienak konponbidea izan dezakeela deskubritzen saiatuko dira. Itxaropena eta elkartasuna dira mundu hobeago baterako bide bakarrak. Non Arrainen Etxea berriro bizirik egongo den, non herriek beren ahotsa eta kantua berreskuratuko duten.

2008an sortu zen Zurrunka Teatro Nafarroan, baina urte gutxira taldea Gasteizen finkatu zen. Konpainiak hainbat pertsona eta eragileren kolaborazio anitzak izan ditu.. Ordudanik antzerki joera ezberdinak landu dituen arren, gaur egun Arabako eszenan txontxongiloak eta itzal antzerkian espezializatua dagoen konpainia da. Arte disziplina anitzetaz baliatuz eta ikuspuntu kritikoaz, gizartearen arazo eta zailtasunen ispilu eta adierazle izatearen konpromisoa izan du beti helburu eta abiapuntu. Konpainiak ekoiztutako ikuskizunak: “Karakolaren gaua”, “Erraldoi Bihotzgabea”, “Iraungorriko Marimiri”, “Kirikiñolandiako Titiriteroak”, “Kalekolore”, “AC-NUN, un ciprés en un desierto” , “Aquí estás mejor”, “Aioko”, “Ruta 1492” eta “Ctrl Alt Supr”.

Horrez gain, itzal-titere laborategiak eskaintzen ditu, itzal-antzerkian etengabe ikertuz eta teknika hau gizarteari zabalduz. Kolectivo Monstrenkorekin aritzen da elkarlanean.

• Eguna: Urriak 9, domeka
• Ordua: 17:00
• Lekua: Zaraia aretoa
• Prezioa: 3 €

Erosi zure sarrera