Udalak 15,4 milioi euroko aurrekontua kudeatuko du aurten

Udal Gobernuak 15.407.226 euroko aurrekontua onartu zuen 2023rako azken Osoko Bilkuran. EH Bildu abstenitu egin zen bozketan.

Alkateak azaldu zuenez, aurrekontuak hainbat arrazoiengatik 2022an gauzatu ezin izan diren jarduerak jasotzen ditu. Alderdi ekonomikoari dagokionez, lau milioi euro baino gehiagoko desoreka dago gastu eta diru-sarrera arrunten artean. “2,7 milioi euroko kreditua aurreikusi genuen, baina ez da gauzatu; izan ere, proiektu nagusien hasiera eta garapenak atzeratu direnez, ez da beharrezkoa izan. Martxoaren hasierarako, 2022ko kontuen likidazioarekin batera jakingo dugu kreditua erabili beharko dugun edo ez, eta, hala balitz, zenbatekoa izango den, baina hasiera batean aurreikusitakoa baino askoz txikiagoa izango da”, adierazi zuen Elkorok.

Inbertsio nabarmenenak

15 milioi euro horietatik, 4.175.672 euro inbertsioetara bideratzen dira. Kapitulu honetan, komentuan egokitzen ari diren adinekoentzako gizarte zentroko lanen amaiera nabarmentzen da. Proiektu honetarako 1.507.500 euro gorde dira.

Beste 1.387.000 euro, hainbat partidatan banatuta, komentuaren ingurua egokitzeko lanetara zuzentzen dira. Esku-hartze hau eraikina herrian integratzean datza, egungo horma eraitsiz eta oinezkoentzako zubi bat eraikiz, Errekabarren Iturrizar plazarekin eta, aldi berean, Txarapearekin lotuko duena. Lotura hori Iturrizar plazako etxebizitzen urbanizazioan eraikiko diren eskailerekin eta igogailu publikoarekin lortuko da. Horrela, Deba ibaiaren bi ertzak komunikatzeaz gain, ingurune hori guztia irisgarriago eginez, ibaia zeharkatzen duen erdi-tentsioko linea ere lurperatuko da puntu horretan. Egungo transformadorea beste puntu batera eramango da.

EH Bilduren lau emendakin onartu dira

Bestalde, EH Bilduk 2022ko aurrekontuaren “exekuzio maila baxua” azpimarratu zuen, eta 2023ko kontuak “kontinuistatzat” jo zituen. Hamaika emendakin aurkeztu zituen, eta horietatik lau aurtengo aurrekontu-proiektuan sartu dira:

1. Copreciko bidegorria osatzea: 8.000 euro.
2.  Murubide pilotalekuan sare bat ipintzea: 1.000 euro.
3. Energia aholkularitza bulegoa martxan jartzea: 10.000 euro.
4.  Alokairu sozialerako udal parkea sortzea: 106.000 euro.

Inbertsioak:

1. Komentua eraberritzea (adineko pertsonentzako gizarte zentroa): 1.507.500 euro.
2. Iturrizar plaza eta Txarapea artean igogailu bat eraikitzea: 500.000 euro.
3. Komentu inguruko zubia: 350.000 euro.
4. Komentu inguruko urbanizazioa: 312.000 euro.
5. Komentu inguruko transformadorea lekuz aldatzea: 225.000 euro.
6. Arkuperako eguzki plakak: 80.000 euro.
7. Kiroldegian led argiak jartzea: 60.000 euro.
8. Erraldoi berriak: 9.000 euro.
9. Basabeazpi parean estalkiaren proiektua: 10.000 euro.