Gobernu berria martxan dago jada

2023/06/27

Udal gobernu berria osatzeko prozesuaren barruan, ezohiko osoko bilkura egin da, eta, besteak beste, Tokiko Gobernu Batzarreko kideen berri eman da, liberazioak eta talde politikoentzako diru ekarpena erabaki dira, eta informazio-batzordeak abian jarri dira.

Udala eta bere egitura ahalik eta lasterren martxan jarri nahi izan du gobernu-talde berriak, eta horretarako, alkatea aukeratu eta astebetera egin da osoko bilkura hau.

Alkateaz gain, lau zinegotzik osatuko dute Tokiko Gobernu Batzarra. Hala, EH Bilduko Nerea Zubillaga Herran, Ion Albizu Gonzalez eta Ainhoa Sanchez Garcia izango dira alkateordeak, eta batzordeko bosgarren kidea EAJko Mikel Uribetxebarria Barrena izango da.

Liberazioei dagokienez, Garikoitz Iturbe eta Ion Albizu lanaldi osoz arituko dira Udalean, eta Ainhoa Sanchez % 33an. Hala ere, eta lan kontuengatik, momentuz Ion Albizuren liberazioa bakarrik gauzatu da, lanaldiaren % 67arekin. Gainerakoen liberazioak, dagoeneko beraien karguei dagozkien eginkizunak betetzen ari badira ere, irailaren 1etik aurrera gauzatuko dira. Zinegotzien soldata gordina 42.000 €-koa izango da (Ainhoa Sanchezena, 14.000 €-koa, bere lanaldiaren proportzioan).

Informazio-batzordeak honela eratu dira:

BATZORDEA	LEHENDAKARIA	PARTAIDEAK
OGASUNA/ PERTSONALA	EH BILDU- Garikoitz Iturbe	EAJ/PNV - Unai Elkoro
HIRIGINTZA	EH BILDU - Ion Albizu	EAJ/PNV - Mikel Uribetxebarria
HIRI ANTOLAMENDURAKO PLAN OROKORRA	EH BILDU - Ion Albizu EH BILDU - Garikoitz Iturbe	EAJ/PNV - Unai Elkoro EAJ/PNV - Conchi Muñoz
ONGIZATEA	EH BILDU - Nerea Zubillaga	EAJ/PNV - Karmele Uribarri
BERDINTASUNA	EH BILDU - Ainhoa Sanchez	EAJ/PNV - Maider Tribiño
KULTURA	EH BILDU - Ibai Zangitu	EAJ/PNV - Maider Tribiño
GAZTERIA	EH BILDU - Ainhoa Sanchez	EAJ/PNV - Maider Tribiño
EUSKARA	EH BILDU - Garikoitz Iturbe	EAJ/PNV - Karmele Uribarri
GARAPEN EKONOMIKOA	EH BILDU - Angel Etxabe	EAJ/PNV - Conchi Muñoz
HEZKUNTZA	EH BILDU - Garikoitz Iturbe	EAJ/PNV - Javier Mar
KIROLA	EH BILDU - Garikoitz Iturbe	EAJ/PNV - Javier Mar

Bestelako erabakiak

Bestalde, udalak parte hartzen duen erakundeetarako udal ordezkariak zein izango diren ere erabaki da, Debagoieneko Mankomunitatekoa izan ezik, aurrerago erabakiko baita.

Gobernua martxan jartzeaz gain, 2024ko abuztuaren 16a herriko jaia izatea erabaki da, eta zozketa egin da uztailaren 23ko hauteskundeetarako hauteskunde-mahaietako kideak aukeratzeko.