FOTOGRAFÍA DE CALLE Y PASEO CONSCIENTE - Gustavo Bravo

Kazetari eta argazkigintzako irakasle den Gustavo Bravok “Fotografía de calle y paseo consciente” izeneko hitzaldia eskainiko du maiatzaren 5ean, ostirala, arratsaldeko 6etan, Aretxabaletako Arkupe Kultur Etxeko Zaraia aretoan.

Ekitaldi honekin hasiera emango dio “Beltzuria” izeneko lanaren erakusketari, eta maiatz osoan zehar bisitatu ahal izango dugu Kultur Etxean bertan. Proiektua metakrilatoan eginiko 75 x 50 cm-ko hamasei obra originalek osatzen dute, eta horien bidez, gorputzek bide publikoan hartzen duten plastikotasunari eta hizkuntzari buruzko hausnarketa egiten da, hiri-arkitektura aseptiko eta hotzaren ondorioz espazioetan biltzen den energiari emandako erantzun gisa.

Gustavo Bravok, duela hamarkada batetik Gasteizko ‘FotoGasteiz’ argazki-eskola zuzentzen duenak, bere lan honen xehetasun guztiak azalduko dizkigu ostiraleko hitzaldian. Proiektua Ixiar Rozasen “Beltzuria” liburuko testuetan oinarrituta dago, eta 2021etik 2022ra bitartean garatu zuen, Bilboko kale nagusietan zehar kamerarekin ordu luzez gora eta behera ibili ondoren. 

Gainera, entzutera hurbiltzen diren guztiei azalduko die begirada heztearen eta garatzearen garrantzia, balioan jarriz argazkia egiteko ekintzak berak gure garaiko edertasuna eta kezkak aitortzeko eta adierazteko daukan ahalmena. Eta bide horretan lagungarri izan dakiguke -eta asko- kaleko argazkigintzan hastea, ibilaldi kontzientea egiteko ariketa edo aitzakia gisa hartuta.

Hizkuntza: gaztelania